Biber

Dir hutt e Kand tëscht 6 an 8 Joer (Cycle 2) a wëllt, dass Ärt Kand Wäerter kenneléiert, déi am Liewe wichteg sinn, da sitt Dir genau richteg bei eis. All Samschde Moie versammele mir eis beim Scoutschalet um Houwald fir flott a spannend Aktivitéiten am Bësch an an der Natur ze ënnerhuelen. D’Joer schléisse mir offiziell mat eisem Summercamp vun 3 Nuechten of.

Versammlungen sinn all Samsden

vun 10:00 – 11:30

Aktivitéiten & Ausflich

Niewend de reegelméissege Versammlunge maache mir och Ausflich wéi Schwemm, Bauerenhaff oder aner spannend Sortien. Zousätzlech huele mir u Solidaritéitsprojeten deel, z. B. Weihnachten im Schuhkarton.

Zesummenhalt & Wäerter

D’Kanner erliewen, datt mir all zu enger grousser Famill gehéieren. Onofhängeg vu Kultur, Relioun, Sprooch oder Hautfaarf si mir all gläichwäerteg a léieren, Respekt ze weisen an zesummen ze halen.

Natur & Verantwortung

An der Natur entdecken d’Kanner hiert Ëmfeld mat Oppenheet a Freed. Si léieren d’Schéinheet vun eiser Natur ze schätzen an dobäi Verantwortung ze iwwerhuelen.

Biber | Scoutmethod

An de Biber schaffe mir mat der offizieller Scoutsmethod, déi sech op 5 Haaptberäicher fokusséiert. Spiller, Aktivitéiten a Sortien hëllefen Äre Kanner, sech an dës Beräicher weider ze entwéckelen.

De Kierper

D’Aktivitéite bei de Biber ginn de Kanner vill Geleeënheet, physesch aktiv ze sinn. Si verbesseren hir kierperlech Fäegkeeten an entwéckelen e Bewosstsinn fir hire Kierper an e gesonde Liewensstil.

De Geescht

Verschidde Challengë fuerderen d’Kanner eraus, kreativ an innovativ ze ginn an op nei Situatioune kënnen ze reagéieren. Si léieren Informatiounen ze sammelen, ze verschaffen an sech eng eege Meenung ze bilden.

D’Gefiller

Aktivitéiten am Grupp hëllefen de Kanner, hir eege Gefiller wouerzehuelen an auszedrécken. Gläichzäiteg léieren si d’Gefiller vun aneren ze erkennen an ze respektéieren.

D’Spiritualitéit

An engem oppene Jugendmouvement hunn d’Kanner d’Méiglechkeet, verschidde Glawensrichtungen a Meenungen kennenzeléieren. Dëst geschitt mat Oppenheet a Respekt a ënnerstëtzt si op der Sich no hirer perséinlecher Weltusiicht.

Dat Soziaalt

Duerch d’Liewen a klenge Gruppe léieren d’Kanner, datt een zesumme méi erreeche kann ewéi eleng. Si entwéckelen Teamgeescht a sozial Kompetenzen fir zesummen ze plangen an eppes op d’Been ze stellen.